Иштироки Ҷумҳурии Тоҷикистон дар иҷлосияи панҷуми Ассамблеяи муҳити зисти СММ (UNEA-5.2) дар Найробӣ

Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон дар иҷлосияи барқароршудаи панҷуми Ассамблеяи муҳити зисти СММ (UNEA-5.2) ва дар ҷаласаи ғайринавбатии Ассамблея бахшида ба 50-солагии таъсисёбии он ширкат хоҳад кард. Барномаи муҳити зисти СММ (UNEP@50) аз 28 феврал то 2 марти соли 2022 ва 3-4 марти соли 2022 дар қароргоҳи Барномаи муҳити зисти Созмони Милали Муттаҳид (UNEP) дар Найробии Кения баргузор мешавад.

Иҷлосияи панҷуми Ассамблея таҳти раёсати Эспен Барт Эйде, вазири иқлим ва муҳити зисти Норвегия таҳти унвони "Тақвияти фаъолияти экологӣ барои ноил шудан ба Ҳадафҳои Рушди Устувор" баргузор мешавад. Дар назар аст, ки дар ҷаласа эъломияи сиёсӣ дар ин мавзуъ қабул ва як қатор ташаббусҳои муҳим барои ҳалли бӯҳрони сегонаи сайёраи тағирёбии иқлим, талафоти гуногунии биологӣ, ифлосшавӣ тавассути партовҳои пластикӣ, барқарорсозии муҳити зист, иқтисодиёти даврӣ ва ҳифзи гуногунии биологӣ мувофиқа карда шаванд.

Сессияи махсус, ки ба он раиси нави сессияи шашуми Ассамблея раёсат мекунад, имконияти беназиреро барои ёдоварӣ ва ҷашн гирифтани дастовардҳои зиёди ЮНЕП аз замони таъсиси он дар Конфронси Созмони Милали Муттаҳид соли 1972 оид ба муҳити инсон дар Стокголм, Шветсия фароҳам меорад. Инчунин, имкони хуберо фароҳам меорад, ки ба оянда назар андозем ва амалҳои ояндаро барои ҳалли мушкилоти экологии имрӯз ва фардо баррасӣ кунем. Интизор меравад, ки дар ҷаласа эъломияи сиёсӣ қабул шавад, ки ҳадафи он таҳкими UNEP ва густариши бисёрҷонибаи ҷаҳонии экологӣ мебошад. Дар мулоқоти сатҳи баланд инчунин дастовардҳои Ҷумҳурии Тоҷикистон дар соҳаи ҳифзи муҳити зист, ташаббусҳои глобалии Президенти Ҷумҳурии Тоҷикистон муҳтарам Эмомалӣ Раҳмон, аз ҷумла эълон гардидани соли 2025 ҳамчун Соли ҳифзи пиряхҳо ва эълон кардани Рӯзи байналхалқии муҳофизати онҳо муаррифӣ карда мешаванд.

2-4 марти соли 2022 як сегменти муштараки сатҳи баланд барои ду ҷаласа ташкил карда мешавад, ки дар он вазирони муҳити зист ва қисми роҳбарони давлатҳои ҷаҳон шахсан иштирок мекунанд, то ба таҳкими татбиқи ҷанбаи экологии Ҳадафҳои Рушди Устувор мусоидат кунанд.