Ҷамъомади идона бахшида ба Рӯзи Модар

5 марти соли 2022 дар толори маҷлисгоҳи Сарраёсати ҳифзи муҳити зист дар шаҳри Душанбе ҷамъомади идона бахшида ба Рӯзи Модар баргузор гардид.

Ҷамъомади идонаро муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон Мавлодод Абдуқодир Мавлодод ифтитоҳ намуда, матни табрикотии раиси Кумитаро бахшида ба Рӯзи Модар қироат намуд.

Ҳамзамон, муовини якуми раиси Кумита Қиёмзода Зарафо Сӯфиҷон, раиси шӯрои занони Кумита Муқумова Мадина, инчунин алоҳида кормандони сохторҳои соҳавӣ бо суханони табрикотӣ баромад намуда, занону бонуворо ба рӯзи идашон табрику шодбош гуфтанд.

Дар ҷамъомад иҷрокунандаи вазифаи сардори Раёсати кадрҳо, коргузорӣ ва назорати Кумита Исуфов Умаралӣ фармоиши раиси Кумитаро ҷиҳати ҳавасмандгардонии бонувон қироат намуда, ба кормандзанони мақомоти ҳифзи муҳити зист ва собиқадорони соҳаи мазкур дар фазои тантанавӣ дастагулҳо ва мукофотҳои пулӣ супорида шуд.

Зимни суханони табрикотӣ баромадкунандагон аз шуҷоату иродаи қавӣ доштан ва масъулияти баланди занон дар фаъолияти соҳавӣ ба ифтихор ёдовар шуда, қайд карданд, ки саҳми занон дар рушду такомули давлатсозӣ ва гулгулшукуфоии Ватани азизамон ниҳоят калон аст.

Роҳбарияти Кумита бо мусоидати Ҳукумати Ҷумҳурии Тоҷикистон ба тақвият бахшидани шумораи кормандон аз ҳисоби занон таваҷҷуҳи хосса зоҳир менамояд, ки дар натиҷа сафи занон дар сохторҳои гуногуни мақомоти ҳифзи муҳити зист сол аз сол зиёд гардида истодааст.

Дар қисмати дигари чорабинӣ аз ашъори шоирони классику муосири тоҷик оид ба бузургию ҳаётбахшии Зан-Модар шеърҳо қироат карда шуд.