Форуми “Об ва кӯҳҳо: роҳ ба сӯи рушди устувор”

6 июни соли 2022 дар меҳмонхонаи “Серена-Душанбе” дар доираи   Конфронси дуюми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” Форуми  “Об ва кӯҳҳо: роҳ ба сӯи рушди устувор” баргузор гардид, ки дар он раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон иштирок ва суханронӣ намуд. Форуми мазкур аз ҷониби ЮНЕСКО ва Маркази минтақавии СММ оид ба дипломатияи пешгирикунанда барои Осиёи Марказӣ дар ҳамкорӣ бо Кумитаи ҳифзи муҳити зисти назди Ҳукумати Ҷумҳурии Тоҷикистон ва Академияи миллии илмҳои Тоҷикистон созмон дода шуд.

Ҳамзамон, дар оғози чорабинӣ Хонум Наталя Герман, намояндаи махсуси СММ оид ба дипломатияи пешгирикунанда барои Осиёи Марказӣ, Шамила Наир-Бедуэл ҷонишини директори генералӣ оид ба илмҳои табиатшиносии ЮНЕСКО суханронӣ намуданд.

Сипас, Кавиш Басесвар, узви гурӯҳи асосии “Конфронси обии СММ 2023”, Нидерландия оид ба моҳияти масъалаи мавриди назар бо рӯйнамо баромад намуд.

Дар қисмати дигари Форум намояндагон аз Осиёи Марказӣ масъалаҳои дахлдори кишварҳои худро муаррифӣ намуданд. Ҳамзамон, дар доираи Форуми мазкур равобити дурнамои глобалӣ, минтақавӣ ва маҳаллӣ табодули афкор сурат гирифт.

Дар охир масъалаҳои мавриди назар муҳокима гардида, оид ба онҳо ҳайати намояндагони кишварҳо ба мувофиқа расиданд.