Ҷаласаи Комиссияи байниидоравии шаҳрӣ оид ба маърифати экологӣ баргузор гардид                                                                                          

Дар Мақомоти иҷроияи ҳокимияти давлатии шаҳри Хуҷанд ҷаласаи Комиссияи байниидоравии шаҳрӣ оид ба маърифати экологӣ баргузор гардид.

Хайрулло Ғайбуллозода, муовини аввали раиси шаҳри Хуҷанд ҷаласаро ҳусни оғоз бахшида, иттилоъ дод, ки дар доираи амалӣ гардидани «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» ҷаласаи аввалини Комиссияи байниидоравии давлатӣ оид ба маърифати экологии аҳолӣ дар шаҳр сурат гирифта истодааст, ки дар рафти ҷаласа фаъолияти кори Комиссияи мазкур ҷиҳати татбиқи Барнома дар нимсолаи якуми соли 2022 баррасӣ мегардад.

Сипас роҷеъ ба натиҷаҳои фаъолияти Комиссияи байниидоравии шаҳрӣ оид ба маърифати экологӣ ҷиҳати иҷрои қарори раиси шаҳр “Дар бораи Комиссияи байниидоравии давлатӣ оид ба маърифати экологии аҳолӣ дар шаҳр” котиби Комиссияи байниидоравии давлатӣ оид ба маърифати экологӣ сардори шуъбаи ҳифзи муҳити зист дар шаҳри Хуҷанд Азиз Дӯсматов баромад намуда, аз ҷумла қайд намуд, ки масоили мубрами экологӣ ва ҳифзи муҳити зист яке аз ҷузъҳои ҷудонашавандаи ҷомеаи имрӯза ба ҳисоб меравад. Имрӯз дар тамоми дунё ба масъалаҳои экологӣ, ҳифз ва беҳдошти муҳити зист, алалхусус баланд бардоштани фарҳанг ва маърифати экологии аҳолӣ таваҷҷӯҳи зиёд зоҳир мегардад, чунки аз он некуаҳволӣ ва саломатии инсон вобаста аст. Ҳукумати Ҷумҳурии Тоҷикистон масъалаҳои вобаста ба ҳифзи муҳити зистро дар мадди аввали сиёсати давлатии хеш қарор дода, барои беҳбудии он ғамхории доимӣ зоҳир менамояд.

Мақсади асосии Барнома тарбия ва маърифати экологӣ ба хотири муносибати эҳтиёткорона зоҳир намудан ба муҳити зист, риоя кардани меъёрҳои ахлоқӣ дар раванди муносибат бо табиат ва истифодаи захираҳои табиӣ ва таблиғотӣ ҳадафҳои экологӣ мебошад. Вазифаҳои Барнома ин фароҳам овардани шароити мусоид таввасути амалҳои муштараки маърифатӣ ва ҳифзи муҳити зист, такмили таҳсилоти асосии экологӣ ва мусоидат ба рушди он, ҷорӣ намудани маърифат барои рушди устувор дар таълими расмӣ ва ғайрирасмӣ, ки барои расидан ба ҳадафҳо ва амалисозии принсипҳои рушди устувор мусоидат менамояд мебошад.

Ҷаласа бо вазифагузориҳои навбатӣ ҳусни анҷом ёфт.