Ҷаласаи Комиссияи байниидоравии давлатӣ оид ба маърифати экологии аҳолӣ                                                                                          

28 сентябри соли ҷорӣ дар маҷлисгоҳи Китобхонаи миллии Тоҷикистон ҷаласаи Комиссияи байниидоравии давлатӣ оид ба маърифати экологии аҳолӣ таҳти роҳбарии муовини Сарвазири Ҷумҳурии Тоҷикистон Зиёзода Сулаймон Ризоӣ баргузор гардид.

Дар ҷаласа ҳисоботи аъзои комиссияи байниидоравии давлатӣ, аз ҷумла раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон, муовини якуми вазири маориф ва илми Ҷумҳурии Тоҷикистон Ҷуразода Ҷамшед ва раисони комиссияҳои минтақавии байниидоравӣ дар назди мақомоти иҷроияи маҳаллии ҳокимияти давлатӣ оид ба иҷрои Барномаи давлатии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025, ки бо қарори Ҳукумати Ҷумҳурии Тоҷикистон аз 3 апрели соли 2021, №116 қабул гардидааст, шунида шуд.

Аз тарафи муовини Сарвазири Ҷумҳурии Тоҷикистон Зиёзода С. Р пас аз шунидани ҳисоботҳои аъзоёни комиссияҳо масълаҳои дахлдор дар самти ҳифзи муҳити зист, баланд бардоштани сатҳи маърифати экологии аҳолӣ, истифодаи оқилонаи замин, сарватҳои табиӣ, беҳдошти ғизои аз ҷиҳати экологӣ солим, таъмини амнияти экологӣ, боз ҳам беҳтар гардонидани корҳо оид ба тозагӣ ва сабзу хуррамгардонӣ дар шаҳру ноҳияҳо ҷиҳати мутобиқшавӣ ба тағйирёбии иқлим, мавриди таваҷҷуҳи масъулони Барнома қарор дода шуд.

Пас аз шунидани ҳисоботҳо, супоришҳои додашуда ва таклифу пешниҳодҳо қарори дахлдори ҷаласаи Комиссияи байниидоравии давлатӣ оид ба маърифати экологии аҳолӣ такмил ва тасдиқ гардида, барои чораҷӯӣ ба ниҳодҳои масъули иҷрои Барнома фиристода мешавад.