Мулоқоти раиси Кумита бо коршиносони байналмилалӣ оид ба масъалаҳои ЮНЕСКО                                                                                                    

14 октябри соли ҷорӣ мулоқоти раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бо коршиносони байналмилалӣ оид ба масъалаҳои ЮНЕСКО ҷанобони Чимед-Очир Базарсад ва Буторин Алексей баргузор гардид. Зимни вохӯрӣ масъалаҳо оид ба миссияи арзёбии саҳроии Чимед-Очири Бозорсад ба мамнуъгоҳи давлатии «Бешаи палангон» бо мақсади ба Рӯйхати мероси умумиҷаҳонии ЮНЕСКО пешниҳод намудани ҷангалҳои туғайи мамнуъгоҳи «Бешаи палангон» мавриди баррасӣ қарор гирифтанд.

Чимид-Очир Базарсад қайд намуд, ки дар рафти сафари маҳаллӣ, тамоми маълумоти зарурӣ ва кори мутахассисон дар идоракунии мамнуъгоҳ гирифта шуд.

Коршиносони байналмилалӣ ба раиси Кумита барои ташкили хуби сафарашон ба Тоҷикистон ва оростани мулоқот, ки дар ҷараёни он муколамаи судманд миёни ҷонибҳо сурат гирифт, изҳори сипос карданд.