Машварати корӣ бо гурӯҳи кории шаҳри Истиқлол оид ба масъалаҳои экологӣ               

Сарраёсати ҳифзи муҳити зист дар вилояти Суғд бо Ташкилоти ҷамъиятии «Гурӯҳи ҷавонон оид ба ҳифзи муҳити атроф» ҳамкории зич дошта, дар доираи татбиқи Лоиҳаи «Ҷалби ҷонибҳои манфиатдор дар ҳалли мушкилот оид ба партовҳои уран дар Осиёи Марказӣ, Марҳилаи II» бо мақсади таъмини ҳамкорӣ ва ҳамоҳангсозии корҳои барқарорсозӣ, ҳамзамон таҳияи лоиҳаҳои хурд бо гурӯҳи кории шаҳри Истиқлол оид ба масъалаҳои экологӣ машварати корӣ баргузор намуд.

Тибқи нақша, дар соли ҷорӣ чунин чорабинӣ се маротиба пешбинӣ гардида, дар рафти кори вохӯрии дуюм намояндагони Мақомоти иҷроияи ҳокимияти давлатии шаҳр, муассисаҳои таълимии соҳаи маориф, хоҷагии манзилию коммуналӣ, корхонаи обу корезӣ, кумитаҳои маҳаллӣ ва сокинони фаъол иштирок намуданд.

Дар рафти вохӯрӣ ба аъзоёни гурӯҳи корӣ тибқи барнома аз ҷониби намояндагони Сарраёсати ҳифзи муҳити зист дар бораи муҳим будани баланд бардоштани сатҳи маърифати экологӣ, Ташкилоти ҷамъиятии «Гурӯҳи ҷавонон оид ба ҳифзи муҳити атроф» ва намояндаи Мақомоти иҷроияи ҳокимияти давлатии шаҳри Истиқлол дар бораи семинари минтақавӣ «Ҷалби ҷонибҳои манфиатдор дар ҳалли мушкилот оид ба партовҳои уран дар Осиёи Марказӣ, Марҳилаи II», ки дар шаҳри Тошканди Ҷумҳурии Ӯзбекистон чанде қабл баргузор гардида буд, ҳамчунин аз ҷониби намояндаи ташкилоти ҷамъиятӣ дар бораи мониторинги экологӣ ва оид ба таҳияи лоиҳаҳо барои ҳал намудани масъалаҳои экологӣ, аз тарафи сармуҳаррири рӯзномаи вилоятии «Согдийская правда» дар бораи нақши воситаҳои ахбори омма ва ташкилоти ҷамъиятӣ дар ҳалли масъалаҳои экологӣ маълумот пешниҳод гардид.

Бояд қайд намуд, ки баргузории чорабиниҳои мазкур ҷиҳати баланд бардоштани сатҳи маърифати экологии аҳолӣ ва дар татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» саҳми назаррас доранд.