Натиҷагирӣ аз фаъолияти Кумита ва мақомоти зертобеи он дар соли 2022 ва вазифаҳо барои соли 2023                                           

9 январи соли 2022 таҳти раёсати раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон бо иштироки аъзоёни мушовара, намоянда аз Ҳукумати Ҷумҳурии Тоҷикистон, сардори раёсати кишоварзӣ ва ҳифзи муҳити зисти Дастгоҳи иҷроияи Президенти Ҷумҳурии Тоҷикистон Мирзодавлат Сабурзода, сардорони сарраёсатҳо, раёсатҳо, шуъбаю бахшҳо, дигар марказу муассисаҳои тобеи Кумита ва мақомоти маҳаллии ҳифзи муҳити зист оид ба натиҷагирии фаъолияти Кумита ва мақомоти зертобеи он дар соли 2022 ва вазифаҳо барои соли 2023 ҷаласаи мушовараи Кумита баргузор гардид.

Дар оғоз  масъалаҳо ва реҷаи муҳокимаҳои онҳо  дар ҷаласаи мушовара  пешниҳоди иштирокдорон карда шуда, сипас аз рӯи масъалаи рӯзномаи ҷаласа муовини якуми раиси Кумита Қиёмзода З. С. бо маърӯзаи таҳлилӣ баромад намуд.

Ҳамзамон, дар ҷаласа сардорони сарраёсатҳои ҳифзи муҳити зист дар ВМКБ Назаралиев М., Суғд Ҳакимзода А., Хатлон Саидзода И., Раёсати ҳифзи муҳити зист дар минтақаи Кӯлоб Соҳибов Қ., Сарраёсати ҳифзи муҳити зист дар шаҳри Душанбе Раҳмонзода Л., ҳамчунин сардорони раёсатҳои назорати давлатии дастгоҳи марказии Кумита, экспертизаи давлатии экологӣ, директорони мамнуъгоҳҳо ва парки миллӣ оид ба фаъолияти сохтори худ дар соли ҳисоботӣ дар ҳузури иштирокдорон ва ҳайати мушовара ба маърӯзаи ҳисоботӣ баромад намуданд.

Раиси Кумита Шерализода Б. А. оид ба ҷузъиёти ҳар як самти фаъолияти соҳавии назорати давлатӣ, баланд бардоштани сатҳи маърифати экологии аҳолӣ, фаъолияти нозирони соҳавӣ бо пурсишҳо ва таҳлилу муқоисаҳо баромад намуда, сабабу омилҳои назаррас набудани баъзе нишондодҳои сохторҳоро дар ҷойҳо аз ноуҳдабароии масъулон маънидод кард.

Бинобар ин, барои ҷоннок кардани фаъолияти нозирони давлатӣ комиссияи босалоҳияти дохилӣ ташкил гардида, аз ҷониби ин комиссия фаъолияти нишондодии ҳар як нозири давлатӣ дар ҷойҳо ба тариқи пурсишномаҳои меъёрӣ натиҷагирӣ карда шуд, ки дар натиҷа як қатор нозирони фаъол бо сипосномаю ифтихорномаҳо сарфароз гардонида шуданд, баракси ин як қатор кормандоне, ки аз рӯи нишондоди баҳодиҳӣ фаъолияти самарабахш надоштанд нисбати онҳо муҷозотҳои интизомӣ татбиқ гаштанд.

Дар чорабинии имрӯза ҳамзамон ғолибони озмуни “Китобхони беҳтарин”-и Кумита, ки қаблан бо фармоиши раиси Кумита эълон гашта, дар охири соли 2022 аз тарафи комиссияи озмуни мазкур ҷамъбаст гардида буд, бо диплому ифтихорномаҳо ва мукофотҳои пулӣ сарфароз гардонида шуданд.

Дар рафти баргузории ҷаласаи мушовара намоянда аз Ҳукумати Ҷумҳурии Тоҷикистон, оид ба нуктаҳои Паёми имсолаи Президенти Ҷумҳурии Тоҷикистон ба Маҷлиси Олиии мамлакат, татбиқи Даҳсолаи байналмилалии амал “Об барои рушди устувор, солҳои 2018-2028”, тағйирёбии иқлим, ба хусус андешидани чораҳои зарурӣ ҷиҳати аз ҷониби Маҷмааи СММ “Соли байналмилалии ҳифзи пиряхҳо” қабул гардидани соли 2025, дигар чорабиниҳои вобаста ба он, омодагӣ ба 35-солагии Истиқлолияти давлатии Ҷумҳурии Тоҷикистон, таъмини иҷрои босифату саривақтии барномаҳои давлатӣ, дастуру супоришҳои мақомоти болоӣ, риояи талаботи ҷории қонунгузорӣ дар соҳаи ҳифзи муҳити зист, дигар қонунгузориҳо, амалигардонии Конвенсияҳои экологӣ, ҷамъоварӣ ва безараргардонии фурӯзонакҳои каммасрафи аз истифода баромада, тозаву озода нигоҳ доштани муҳити зист ва дигар масъалҳои вобаста ба фаъолияти соҳавӣ суханронӣ намуд.

Дар охир бо натиҷагирӣ аз фаъолияти Кумитаи ҳифзи муҳити зист ва сохторҳои он дар соли 2022 ва вазифаҳо барои соли 2023 қарори дахлдор қабул карда шуд.