Аксияи "Саҳми ман дар беҳдошти муҳити зист" дар ш. Ваҳдат

20 феврали соли ҷорӣ дар Коллеҷи сайёҳӣ ва хизматрасонии ш. Ваҳдат дар ҳамкорӣ бо мутахассисони шуъбаи ҳифзи муҳити зисти шаҳри мазкур аксияи “Саҳми ман дар беҳдошти муҳити зист” баргузор гардид.

Дар аксия омӯзгорон ва донишҷӯёни ин муассиса фаъолона ширкат варзида, ду шафати роҳи асосии автомобилгардро аз назди коллеҷ то деҳаи Зафарёб аз партовҳои гуногун, махсусан партовҳои маишӣ тозаву ҷамъовари намуданд.

Барои ташкили чунин як чорабинии экологӣ ва ҳамкории зич шуъбаи ҳифзи муҳити зист дар ш. Ваҳдат ба роҳбарияти коллеҷ изҳори сипос намуда, зикр карда шуд, ки ҳамкориҳоро ҷиҳати беҳдошти муҳити зист ва ҷалби сайёҳон ба шаҳри Ваҳдат боз ҳам хубтар ба роҳ мемонем.