Паёми Президент-кафили суботи ҷомеа

                                                                

Дар толори Сарраёсати ҳифзи муҳити зист дар шаҳри Душанбе вобаста ба шарҳу тавзеҳи Паёми Президенти Ҷумҳурии Тоҷикистон "Дар бораи самтҳои сиёсати дохилӣ ва хориҷии Ҷумҳурии Тоҷикистон” бо иштироки  Халифазода Мумин Матлуб, прокурори калони шуъбаи назорати умумии Прокуратураи шаҳри Душанбе, Аслиддин Ёров , сармутахассиси Сарраёсати маорифи шаҳри Душанбе ва Сулаймонов Комрон, муовини сардори Раёсати ҷавонон ва варзиши шаҳри Душанбе вохӯрӣ бо кормандони ниҳоди болозикр доир гардид.

Дар оғоз, Лоиқ Раҳмонзода, сардори Сарраёсати ҳифзи муҳити зист дар шаҳри Душанбе, зикр намуд, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми имсола оид ба таъмини пешрафти соҳаҳои иқтисодиву иҷтимоӣ, тандурустиву  маориф ва ҷавонон вазифаҳои мушаххас ба миён гузоштанд.

Халифазода Мумин Матлуб, прокурори калони шуъбаи назорати умумии Прокуратураи шаҳри Душанбе  зимни суханронии худ қайд намуд, ки Президенти Ҷумҳурии Тоҷикистон дар Паёми имсола бо ифтихормандӣ зикр намуданд, ки бо шарофати заҳмати содиқонаи мардуми кишвар раванди созандагиву ободкорӣ бомаром идома ёфта, рушди устувори иқтисоди миллӣ ва баланд бардоштани сатҳу сифати зиндагии сокинони мамлакат ҳадафмандона амалӣ карда шуд.

Аслиддин Ёров,  сармутахассиси Сарраёсати маорифи шаҳри Душанбе бо ишора ба таъкидҳои Президенти Ҷумҳурии Тоҷикистон гуфт,  ки пешрафти давлат ва ояндаи ободи Ватан аз сатҳи донишу маърифатнокии мардум вобастагии мустақим дорад. Дарвоқеъ, мактаб даргоҳи илму маърифат буда, омӯзгор ба ҳайси тарбиятгари насли наврас ҷиҳати ба камол расидани насли ояндасози миллат хидмат менамояд. Ҳамасола аз ҷониби Ҳукумати кишвар ба соҳаи маориф маблағҳои лозима равона гашта, барои фароҳам овардани шароити мусоиду беҳтар барои наврасону ҷавонон заминаи боэътимод мегузорад.

Ҳамзамон таъкид карда шуд, ки дар мавсими ниҳолшинонии тирамоҳи соли 2022 ва баҳори соли 2023 бо ибтикороти Кумитаи ҳифзи муҳити зисти назди Ҳукумати Ҷумҳурии Тоҷикистон ҷиҳати амалишавии барномаҳои ҳифзи муҳити зист ва таъмини сарсабзию шукуфоии талу теппаҳои пойтахт ба миқдори 6715 бех дарахтони ороишӣ шинонида  мешавад.

Дар фарҷоми вохӯрӣ сардори Сарраёсати ҳифзи муҳити зист дар шаҳри Душанбе  таъкид намуд, Паёми имсолаи сарвари давлат кафили босуботи ҷомеаи Тоҷикистони соҳибистиқлол маҳсуб ёфта, бо заҳмати содиқонаи мардуми кишвар аз ҷумла, сокинони шаҳри Душанбе раванди корҳои созандагиву ободкорӣ бо маром ҷараён гирифта, ҷиҳати таъмини рушди иқтисоди миллӣ барномаҳо ҳадафмандона амалӣ мешаванд.