Ҷаласаи навбатии Комиссияи иқтисодии Аврупои СММ оид ба маърифат барои рушди устувор

Рӯзҳои 25-26 майи соли 2023 дар шаҳри Женеваи давлати Шветсария ҷаласаи 18-уми Кумитаи роҳбарикунандаи Комиссияи иқтисодии Аврупоии Созмони Милали Муттаҳид оид ба маориф барои рушди устувор баргузор гардид, ки дар он натиҷаҳои ҷаласаи сатҳи баланди намояндагони вазоратҳои маориф ва ҳифзи муҳити зист 5 октябри соли 2022 дар Никосия баргузор гардида ва татбиқи Стратегияи Комиссияи иқтисодии Аврупоии Созмони Милали Муттаҳид барои маориф ҷиҳати рушди устувор муҳокима гардиданд.

Ғайр аз ин, дар ин ҷаласа намояндагони тарафҳо оид ба ҷараёни татбиқи Стратегияи мазкур дар сатҳи миллӣ, аз ҷумла оид ба таълими босифат ва рушди устувор, нақши ҷавонон, соҳибкорӣ ва инноватсия ва дигар самтҳои пешбининамудаи ин ҳуҷҷат маълумот доданд.

Ҷониби Ҷумҳурии Тоҷикистонро дар ин чорабинӣ сардори Маркази ахбори экологӣ, тарғибот ва барномасозии копютерии Кумитаи ҳифзи муҳити зисти назди Ҳукумати Ҷумҳурии Тоҷикистон Тиллоӣ Гулрухсор намояндагӣ намуда, доир ба дастовардҳои кишвар оид ба рушди устувор, аз ҷумла қабул ва татбиқи санадҳои меъёрии ҳуқуқӣ, аз қабили Барнома ва Стратегияҳо, такмили барномаҳои омӯзишии соҳаи маориф, рушди иқтисодиёти сабз ва дигар корҳои анҷомдодашуда бо назардошти самтҳои муайяннамудаи Стратегияи Комиссияи иқтисодии Аврупоии СММ ва қадамҳои минбаъда дар ин самт маълумот пешниҳод намуд.