Дар доираи сафари кории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ аз рафти тадбирҳои ободонӣ ба истиқболи ҷашни 35-солагии Истиқлоли давлатӣ ва суҳбату мулоқот бо сокинон ба Вилояти Мухтори Кӯҳистони Бадахшон як қатор иншооти сохтмонашон баанҷомрасида ифтитоҳ карда шуданд.

Санаи 14 августи соли равон дар ноҳияи Мурғоби ВМКБ Маркази офиятбахшӣ ва парвариши бабри барфӣ, ки аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон бо мақсади табобату офиятбахшии ҳайвонҳои нодири ноҳия, аз ҷумла бабри барфӣ сохта шудааст, ифтитоҳ гардид. Дар Маркази мазкур ҳайвоноти нодир, ки дар ҳолатҳои гуногун захм бардошта, ё ба бемориҳои дигар дучор шудаанд табобат карда шуда, сипас ба табиат сар дода мешаванд.

Қайд кардан бамаврид аст, ки яке аз ҳадафҳои асосии бунёди Маркази мазкур наслгирӣ ва зиёд намудани теъдоди бабри барфӣ дар табиати кӯҳии мо, бурдани корҳои омӯзишӣ ва илмӣ бо ҷалби олимони дохилӣ ва хориҷӣ ба шумор меравад.

Бо мақсади будубоши муваққатии ҳайвоноти нодир ва бо хӯрок таъмин намудани онҳо дар Маркази офиятбахшӣ аз тарафи Кумитаи ҳифзи муҳити зист дар ноҳияи Ишкошими ВМКБ сохтмон ва бунёди “Хоҷагии ёрирасон” дар назар дошта шудааст, ки дар он ҳайвоноти хурд, ба монанди харгӯш парвариш карда мешавад.

Чунин шароит имкон медиҳад, ки сайёҳони дохилию хориҷӣ аз чунин Маркази офиятбахшие, ки дар он ҳайвоноти нодир ҳифз ва нигоҳдорӣ мешаванд дидан намоянд.

Масоҳати умумии Маркази офиятбахшӣ ва парвариши бабри барфӣ дар ноҳияи Мурғоб 10 гектарро ташкил дода, дар доираи ин иншооти ҷашнӣ корҳои муайян ба анҷом расидаанд. Аз ҷумла масоҳати фоиданок барои сайри бабри барфи  аз 1100м2, масоҳати фоиданок барои шикори бабри барфӣ 7 гектар, ё ин ки 70000 м2, роҳравҳо аз тахтасангҳо 80м2, чарағокҳои баландпоя барои равшанидиҳӣ, таваққуфгоҳ барои автомашинаҳо, камераҳои назоратӣ, панҷарабандии гирду атроф 6900 м2  ва дигар таҷҳизоти зарурӣ иборат аст.

Ноҳияи Мурғоб, табиату иқлими хоси худ ва ҳайвоноти нодир чун бабри барфӣ ва гӯсфанди Марко Поло (архари помирӣ), дигар ҳайвоноти нодир дорад, ки муаррифгари Тоҷикистон мебошад.