Ифтитоҳи  Боғи 35-солагии Истиқлолияти давлатии Ҷумҳурии Тоҷикистон дар ноҳияи Мурғоби ВМКБ               

                                          

14 августи соли ҷорӣ  дар аснои сафари  Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ аз рафти тадбирҳои ободонӣ ба истиқболи ҷашни 35-солагии Истиқлоли давлатӣ ва суҳбату мулоқот бо сокинон ба Вилояти Мухтори Кӯҳистони Бадахшон Боғи 35-солагии Истиқлолияти давлатии Ҷумҳурии Тоҷикистон дар ноҳияи Мурғоби ВМКБ ифтитоҳ гардид.

Боғи мазкур бо мақсади баргузории чорабиниҳои фарҳангӣ, идҳои миллӣ, дигар тантанаҳои ҷашнӣ аз тарафи Кумитаи ҳифзи муҳити зисти назди Ҳукумати Ҷумҳурии Тоҷикистон сохта шудааст.

Бунёди Боғи 35-солагии Истиқлолияти давлатии Ҷумҳурии Тоҷикистон дар ноҳияи Мурғоби ВМКБ моҳи майи соли 2023 оғоз ёфта, масоҳати умумии он 2 гектарро ташкил медиҳад. Бо мақсади истироҳату фароғати сокинон ва сайёҳон дар майдони Боғи 35-солагии Истиқлолияти давлатии Ҷумҳурии Тоҷикистон дар масоҳати 10600м2 корҳои кабудизоркунӣ ва 1700 адад дарахтҳо шинонида шудааст.  Ба масоҳати 800м2 роҳравҳо аз тахтасангҳо ороиш ёфта, барои равшанидиҳӣ чароғакҳои баландпоя насб гардидааст.

Барои гузаронидани чорабиниҳо саҳна, ба масоҳати 150м2 майдончаи варзишӣ барои бозии футбол, ба масоҳати 150м2 майдончаи варзишӣ барои бозии баскетбол ва волейбол сохта шуда, қуттиҳои партовҷамъкунӣ ва ба миқдори муайян курсии беруна гузошта шуда, бо масоҳати 1100м2 гирду атрофи боғ панҷарабандӣ карда шудааст.

Ҳамзамон, бо мақсади баланд бардоштани худшиносии сокинон ва фароғати сайёҳон, портретҳои адибони тоҷик  гузошта шуда, ҳамзамон расмҳои  қаҳрамонҳои филмҳои тасвирӣ ва таҷҳизотҳо барои бозиҳои варзишӣ ва  ҳайкалчаҳои ҳайвоноти сунъӣ гузошта шудааст.