Ифтитоҳи Осорхонаи бузи кӯҳии Морхур ва мағозаи армуғонҳои миллӣ дар ноҳияи Дарвози ВМКБ               

                                          

14 августи соли ҷорӣ дар аснои сафари Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ аз рафти тадбирҳои ободонӣ ба истиқболи ҷашни 35-солагии Истиқлоли давлатӣ ва суҳбату мулоқот бо сокинон ба Вилояти Мухтори Кӯҳистони Бадахшон осорхонаи бузи кӯҳии Морхур ва мағозаи армуғонҳои миллӣ дар ноҳияи Дарвоз ифтитоҳ гардид.

Ҳадаф аз бунёди осорхонаи мазкур шинос намудани аҳолии Тоҷикистон ва сайёҳони хориҷӣ бо кишвари зебову хушманзар ва муаррифии ҳайвоноти нодири Тоҷикистон, аз ҷумла бузи Морхур, бабри барфӣ ва гӯсфанди Марко Поло (архари помирӣ) мебошад.

Сохтмони Осорхонаи бузи кӯҳии Морхур ва мағозаи армуғонҳои миллӣ дар ноҳияи Дарвози ВМКБ бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон бо сифати баланд ба итмом расонида шудааст.

Масоҳати умумии бинои осорхона 150 м² ро ташкил дода, дар масоҳати 25м², ки дар он амсилаи ҳайвонту парандаҳои нодир насб карда шудаанд, бо нақшу нигор ороиш дода шудааст. Масоҳати фоиданок барои мағоза 75м² ва роҳравҳо аз тахтасангҳои сафолӣ ва мармар 50м²-ро ташкил мекунад.

Осорхона дар тарғибу ташвиқи олами ҳайвоноти Тоҷикистон дар байни сайёҳони хориҷӣ ва шаҳрвандони ҷумҳурӣ нақши босазои худро мегузорад.