Вохӯрӣ бо Мушовири калони Директори иҷроияи Дафтари СММ оид ба хизматрасонии лоиҳавии рушди шарикӣ               

                                          

28 сентябри соли 2023 вохӯрии муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон Мавлодод Абдуқодир бо Мушовири калони директори иҷроияи Дафтари Созмони Милали Муттаҳид оид ба хизматрасонии лоиҳавии рушди шарикӣ (UNOPS) бо ҷаноби Растислав Вирбенский баргузор гардид.

Зимни вохӯрӣ масъалаҳои ҳамкориҳои дуҷониба дар соҳаи ҳифзи муҳити зист, тағйирёбии иқлим, идоракунии партовҳо ва биёбоншавӣ баррасӣ шуданд.

Муовини раиси Кумита Мавлодод А. М. зарурати ироаи кумакҳои фаннӣ барои омӯзиши вазъи пиряхҳо, таҷдиди озмоишгоҳҳо ва бо таҷҳизоти моддию техникӣ таъмин кардани Маркази минтақавии идоракунии партовҳои Осиёи Марказӣ дар шаҳри Душанберо таъкид кард.

Масъалаҳои омодасозии павилони Тоҷикистон дар COP 28, ки дар Дубай пешбинӣ гардидааст, низ мавриди баррасӣ қарор дода шуд. Ҷониби Кумита аз роҳбарияти UNOPS даъват кард, ки имкони пешниҳоди маводи иттилоотӣ ва баргузории чорабинии сомонавӣ дар павилони Тоҷикистонро баррасӣ кунад.

Ҷаноби Растислав Вирбенский ба иштирок дар павилони Тоҷикистон ва таҳкими ҳамкориҳои Кумита бо UNOPS ҳавасмандӣ изҳор намуд.