Нишасти солонаи марказҳои Орхус - 2023 дар Душанбе               

                                          

Бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон дар робита ба иҷрои супориши Ҳукумати Ҷумҳурии Тоҷикистон аз 14 феврали соли ҷорӣ, №5331 ва дар ҳамкорӣ бо Дафтари Барномаҳои САҲА дар Душанбе рӯзҳои 17-18 октябр бо иштироки намояндагони 14 кишвари аъзои конвенсияи Орхус бо фарогирии зиёда аз 70 нафар иштирокчӣ Нишасти солонаи марказҳои Орхус баргузор гардид.

Дар чорабинӣ намояндагони вазорату идораҳои давлатӣ, Маҷлиси намояндагони Маҷлиси Олии Ҷумҳурии Тоҷикистон, инчунин хабарнигорон аз Агентии миллии Тоҷикистон “Ховар” ва дигар расонаҳои давлативу мустақили Тоҷикистон иштирок намуданд.   

Чорабиниро бо сухани муқаддимавӣ муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон, ҳамзамон ҳамоҳангсози миллии конвенсияи Орхус дар Ҷумҳурии Тоҷикистон Қиёмзода Зарафо Сӯфиҷон ифтитоҳ намуда, доир ба рафти иҷроиши уҳдадориҳои Тоҷикистон дар назди ковненсияи Орхус ишора намуд. Аз ҷумла, қайд гардид, ки намояндагони Марказҳои Орхуси Тоҷикистон дар ҳамкории зич бо зерсохторҳои Кумита бо намояндагони қишрҳои гуногуни аҳолӣ доир ба масъалаҳои экологии ҳалталаби Тоҷикистон семинару мизҳои гирд ва машғулиятҳои омузишӣ мегузаронанд.  

Дар чорабинии байналмилалӣ намояндагони кишварҳо аз минтақаи Аврупои шарқӣ, Балкан, Кавказ ва Осиёи Марказӣ ба се масъала: “Нақши марказҳои Орхус барои ҷалби иштироки ҷомеа дар қабули қарорҳо вобаста ба масъалаҳои ҳифзи муҳити зист”, “Пешбурди принсипҳои иқтисоди сабз” ва “Нақши марказҳои Орхус дар идоракунии партовҳои хатарнок” таваҷҷуҳ зоҳир намуда, аз таҷрибаи ҳамдигар огоҳӣ пайдо карданд. 

 Нишасти солонаи Марказҳои Орхусро муовини раиси Кумитаи ҳифзи муҳити зист Мавлодод Абдуқодир ва намояндаи Дафтари ҳамоҳангсозии фаъолияти иқтисодӣ ва экологии САҲА хонум Сильви Ҳойе бо суханони ҷамъбастӣ натиҷагирӣ намуданд.