Иштироки фаъолонаи Кумита ва сохторҳои он дар Фестивали ҷавонони пойтахт таҳти унвони “Об барои ояндаи мо”               

                                          

25 октябри соли 2023 дар МД Боғи фарҳангию фароғатии “Хайём”-и шаҳри Душанбе Фестивали ҷавонони пойтахт таҳти унвони “Об барои ояндаи мо” баргузор гардид. Чорабинӣ бо ташаббаси Кумитаи иҷроияи Ҳизби Халқии Демократии Тоҷикистон дар ноҳияи Синои шаҳри Душанбе дар асоси нақшаи чорабиниҳои Кумитаи иҷроияи ҲХДТ дар шаҳри Душанбе дар ҳамкорӣ бо Кумитаи ҳифзи муҳити зисти назди Ҳукумати Ҷумҳурии Тоҷикистон ташкил ва баргузор карда шуд.

Дар чорабинии мазкур Кумитаи ҳифзи муҳити зисти назди Ҳукумати Ҷумҳурии Тоҷикистон ва сохторҳои тобеи он дар баробари вазорату идораҳо ва ташкилоту муассисаҳо бо дастовардҳои соҳавии вобаста ба ҳифзи обу пиряхҳо фаъолона иштирок намуд. Дастовардҳои соҳавӣ аз ҷониби дастгоҳи марказии Кумита, Агентии обуҳавошиносӣ, Муассисаи давлатии «Ҳудудҳои табиии махсус муҳофизатшаванда» ва Муассисаи давлатии гуногунӣ ва бехатарии биологӣ ба маърази тамошо гузошта шуданд. Дастовардҳои дар намоишгоҳ гузошташудаи Кумита аз пахши видеороликҳои тарғиботӣ тавассути экран, банерҳо бо навиштаҷот дар бораи ташаббусҳои ҷаҳонии Пешвои муаззами миллат муҳтарам Эмомалӣ Раҳмон вобаста ба об, расму мусаввараҳои табиати зебои Тоҷикистон, аз ҷумла пиряхҳо ва обу кӯлҳо ва дарёҳо, варақаҳои иттилоотӣ ва ғ. иборат буд. Дар чорабинии мазкур ризокорони Кумитаи ҳифзи муҳити зист низ фаъолона иштирок доштанд.

Ҳайати роҳбарикунадаи чорабинӣ аз дастовардҳои бамаъразгузошта, аз ҷумла офаридаи дастранҷи хонандагони муассисаҳои таҳсилоти миёнаи умумӣ ва донишҷӯёни донишгоҳу донишкадаҳои кишвар дидан намуда, ба ҳунари онҳо баҳои сазовор доданд.

Чорабинии мазкур дар доираи татбиқи ҳадафҳои рушди устувор дар соҳаи обу иқлим арзёбӣ карда шуд.