Уфуқи нави рушди экожурналистика дар Тоҷикистон               

                                          

Дар давоми рӯзҳои 17 то 20 октябр дар доираи лоиҳаи «Мутобиқшавии ҳайвоноти ширхӯр ба тағйирёбии иқлим дар Осиёи Марказӣ», ки аз ҷониби ЮНЕП ҳамоҳанг карда шудааст, барои рӯзноманигороне, ки масъалаҳои иқлим ва муҳити зисти Тоҷикистонро инъикос мекунанд, машғулияти омӯзшишӣ ва семинар баргузор гардид. Қобили зикр аст, ки чорабинии мазкур аз ҷониби ташкилоти ҷамъиятии «Aлифбои табиати Тоҷикистон» дар якҷоягӣ бо ташкилоти ҷамъиятии «КAMП Taбиат» ташкил шуда, ба боло рафтани сатҳи маҳорати рӯзноманигорон дар самти фаҳмиш ва интиқоли самараноки маълумот доир ба тағйирёбии иқлим ва робитаи байни тағйирёбии иқлим ва ҳифзи гуногунии биологӣ равона гардидааст. Санаи 18 октябр рӯзноманигорони дар асоси озмун интихобшуда ба ноҳияи Дӯстӣ сафар карда, бо намояндагони мақомоти иҷроияи маҳаллии ҳокимияти давлатӣ ва ҷамоатҳо вохӯриҳо баргузор намуда, бо шароити зиндагии мардуми маҳаллӣ ошно шуданд.

Рӯзи 19 октябр гурӯҳи рӯзноманигорони экологӣ бо ҳамроҳии сарҷангалпарвар аз қитъаҳои гуногуни ҳудуди мамнуъгоҳи давлатии табиии «Бешаи палангон» боздид ба амал оварда, бо намудҳои ҳайвоноти нодири мамнуъгоҳ ва ҷангалҳои нодири туғайзори Осиёи Марказӣ шинос шуданд. Рӯзноманигорон ҳамчунин бо натиҷаи кори суратгираки пинҳонӣ, ки рӯзи 16 октябр насб шуда буданд, шинос шуданд.

Бояд гуфт, ки 4 ноябри соли равон ба таъсисёбии мамнуъгоҳи давлатии табиии «Бешаи палангон» 85-сол пур мешавад. Он бо қарори Шӯрои вазирони ҶШС Тоҷикистон таҳти №1163 бо мақсади ҳифзу нигоҳ доштани экосистемаҳои нодири биёбонӣ-туғайӣ, ки хоси зисти ҳайвоноти биёбонӣ мебошанд, ташкил карда шудааст.

Тазаккур додан бамаврид аст, ки 20 сентябри соли ҷорӣ дар шаҳри Ар-риёди Арабистони Саудӣ ҷаласаи 45-уми Кумитаи байниҳукуматии ҳифзи мероси моддии фарҳангии ЮНЕСКО баргузор гардид, ки ҷангалҳои туғайзори мамнуъгоҳи «Бешаи палангон” якдилона ба Феҳристи мероси ҷаҳонии ЮНЕСКО шомил карда шуд.

Тибқи барнома рӯзноманигорон пас аз тамошо ва шиносоӣ бо мамнуъгоҳи «Бешаи палангон», бояд мавзӯҳояшонро ба аъзои ҳакамон пешниҳод мекарданд.

20 октябр гурӯҳи экожурналистоне, ки дар экспедитсияи кутоҳмуддат иштирок доштанд, барои таҳияи маводҳо дид ва андешаҳояшонро баён намуданд. Дар анҷоми омӯзиш ба рӯзноманигорон сертификатҳоро намояндагони ташкилотҳои GRID Arendal ва UNEP супориданд.