Рӯзҳои 9 ва 10 сентябри соли ҷорӣ дар шаҳри Женева ҷаласа доир ба муҳокимаи лоиҳаи Шарҳи чоруми фаъолияти экологии Тоҷикистон бо иштироки намояндагони Кумитаи ҳифзи муҳити зист ва коршиносони байналмилалии Комиссияи иқтисодии СММ барои Аврупо   баргузо р гардид. Тоҷикистон аввалин давлате аст, ки баррасии Шарҳи чоруми фаъолияти экологиро анҷом медиҳад. Шарҳи натиҷаҳои фаъолият дар соҳаи ҳифзи муҳити зист ба давлатҳо дар беҳтар намудани идоракунии муҳити зист ва баланд бардоштани самаранокии фаъолияти экологӣ мусоидат намуда, мубодилаи иттилоотро байни кишварҳо оид ба сиёсати экологӣ ва таҷрибаи татбиқи он ташвиқ менамояд. Инчунин, ба ҳамгироии сиёсати экологӣ ва сиёсати соҳавӣ дар соҳаҳои алоҳидаи иқтисодиёт мусоидат намуда, масъулияти мақомоти давлатиро дар назди ҷомеа ва таҳкими ҳамкорӣ бо ҷомеаи байналмилалӣ ташвиқ месозад.

Дар лоиҳаи мазкур арзёбии пешрафти давлат дар соҳаи ҳифзи муҳити зист, мувофиқаи вазифаҳои экологию иқтисодӣ ва риояи уҳдадориҳои байналмилалӣ дар ҳама бахшҳо инъикос ёфтаанд.

Зимни баррасии лоиҳаи мазкур воқеияти тавсияҳои коршиносон доир ба фаъолияти экологии Тоқикистон аз ҷониби намояндагони Кумита муҳокима гардида, он бо назардошти эродҳо таҳрир карда шуданд.

Баррасии шарҳи натиҷаҳои фаъолият дар соҳаи ҳифзи муҳити зист дар Ҷумҳурии Тоҷикистон аҳамияти рушди устувор ва ҳифзи муҳити зистро барои наслҳои оянда таъкид менамояд.

Дар ҷаласа зикр гардид, ки Тоҷикистон аз дастовардҳои худ дар соҳаи экологӣ ифтихор дорад ва талошҳои худро барои ба даст овардани муваффақият боз ҳам идома медиҳад.