Ҷаласаи вазирони Осиёи Марказӣ оид ба пешрафт дар татбиқи чаҳорчӯби ҳамаҷонибаи бехатарии мактабҳо дар шаҳри Алма-Ато             

18-19 сентябри соли ҷорӣ дар шаҳри Алма-Атои Ҷумҳурии Қазоқистон ҷаласаи вазирони Осиёи Марказӣ оид ба пешрафт дар татбиқи чаҳорчӯби ҳамаҷонибаи бехатарии мактабҳо баргузор гардид. Дар чорабинии мазкур муовини якуми раиси Кумитаи ҳифзи муҳити зисти назди Ҳукумати Ҷумҳурии Тоҷикистон Қиёмзода Зарафо Суфиҷон ва намояндаи Вазорати маориф ва илми Ҷумҳурии Тоҷикистон иштирок намуданд.

Муовини якуми раиси Кумита Қиёмзода З. С., дар назди иштирокчиёни ҷаласа баромад намуда, масъалаҳои ҷалб намудани таваҷҷуҳи ҷавонон, бахусус мактаббачагон ва донишҷӯён, инчунин баланд бардоштани сатҳи огоҳии онҳо дар бораи масоили экологӣ, чорабиниҳо, аз ҷумла ҳавасмандӣ бо роҳи ташкили озмунҳои  экологӣ, ҷалби онҳо дар ҳалли мушкилоти экологиро гӯшрасу таваҷҷуҳи иштирокдорон намуд.

Сипас, намояндагони ҳайатҳо оид ба вазъи кунунӣ ва дурнамои рушди ҳамкорӣ дар соҳаи ҳифзи муҳити зист маърӯза намуданд.

Ҳамчунин, дар ҷаласа  як қатор масъалаҳое, ки ба рушди амалҳои муштарак дар ҳалли масъалаҳои экологӣ, тағирёбии иқлим, коҳиши партовҳои газҳои гулхонаӣ, идоракунии самараноки партовҳо, рушди ҳамкорӣ дар  минтақаҳои табиии махсус муҳофизатшаванда ва ғайра равона шудаанд, аз ҷониби тарафҳо мавриди  баррасӣ ва тафоҳум қарор дода шуданд.