Тоҷикистони сабз: 500 дарахти сузанбарг дар шаҳри Душанбе барои дастгирии талошҳои миллии барқарорсозии ҷангалҳо шинонда шуд

               

                                          

Бо мақсади фароҳам овардани ояндаи сабз, Кумитаи ҳифзи муҳити зист назди Ҳукумати Ҷумҳурии Тоҷикистон ва намояндагии Хазинаи кӯдакони Созмони Милали Муттаҳид (ЮНИСЕФ) дар Тоҷикистон дар якҷоягӣ иқдоми ниҳолшинониро дар шаҳри Душанбе роҳандозӣ карданд. Ташаббуси мазкур дар доираи «Барномаи давлатии кабудизоркунии Ҷумҳурии Тоҷикистон барои давраи то соли 2040», баргузор гардид, ки тибқи он шинондани ду миллиард ниҳол то соли 2040 ба нақша гирифта шудаст. Иқдоми мазкур, кормандони Кумита, сокинони ноҳияи Шоҳмансур, ҷавонон ва кормандони ЮНИСЕФ-ро муттаҳид карда, дар доираи он 500 ниҳоли сузанбарг шинонда шуд.

Чорабинии болозикр ба баланд бардоштани сатҳи огоҳӣ дар бораи муҳити зист ва ташвиқи иштироки фаъол дар талошҳои умумидавлатии барқарорсозии ҷангалҳо дар Тоҷикистон нигаронида шуда буд. Бо назардошти мушкилоти тағйирёбии иқлим ва нобудшавии ҷангалҳо, чунин ташаббусҳо барои беҳтар намудани сифати ҳаво, пешгирии эрозияи хок ва такмили экосистемаи шаҳрӣ аҳаммияти калон доранд.

Корманди Кумитаи ҳифзи муҳити зист Сайдаҳмад Акрампур дар ҷараёни чорабинӣ аҳаммияти чунин иқдомҳои дастаҷамъонаро таъкид намуда, изҳор дошт:

«Ҳар як дарахте, ки имрӯз шинонда мешавад, ба некуаҳволии наслҳои оянда мусоидат мекунад. «Тоҷикистони сабз» танҳо як барнома нест, балки ҳаракати миллӣ барои рушди устувор аст.»

Мавриди зикр аст, ки иштирокчиёни ҳама синну сол бо шавқу ҳавас дар ин иқдом ширкат варзида ниҳолҳоро шинонда, дарахт об дода, саҳми худро гузоштанд. Ишитирокчиён ҳавасмандии хешро аз иштирок дар бунёди Тоҷикистони сабз баён карданд.

«Барномаи давлатии кабудизоркунии Ҷумҳурии Тоҷикистон барои давраи то соли 2040» бо мақсади густариши ҷангалҳо дар саросари кишвар, коҳиши таъсири тағйирёбии иқлим ва ҳифзи гуногунии биологӣ равона шудааст. Бо иқдомҳое чун «Тоҷикистони сабз – 2040», кишвар барои расидан ба ин ҳадафҳо қадамҳои амалӣ мегузорад.