Табрикоти раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур Аҳмадҷон ба муносибати таҷлили Рӯзи таъсисёбии Қувваҳои Мусаллаҳи Ҷумҳурии Тоҷикистон             

                                          

Ҳамкорони азиз,

23 феврали соли равон ба ташкилёбии Қувваҳои Мусаллаҳи Ҷумҳурии Тоҷикистон, ки яке аз дастовардҳои азими Истиқлолияти давлатӣ ба ҳисоб меравад, 32 сол пур мешавад.

Қувваҳои Мусаллаҳи Ҷумҳурии Тоҷикистон зодаи даврони соҳибистиқлоли кишвар буда, дар назди онҳо вазифаҳои муқаддасу пуршараф ҳимояи соҳибихтиёрӣ, таъмини сулҳу субот, ҳифзи амнияти давлат ва ҷомеа гузошта шудаанд, ки аз он сарнавишти давлат ва тақдири миллат вобаста мебошад.

Таҷрибаи давлатҳое, ки бо роҳи мустақилона пеш мераванд, нишон медиҳад, ки ҳама гуна истиқлолият ниёзманди ҳимояи ҷиддӣ аст. Маҳз бо ҳамин хотир дар замоне, ки ҷанги шаҳрвандӣ ҳануз аланга дошт, дар таърихи навини халқи тоҷик бо фармони Роҳбари давлат Қувваҳои Мусаллаҳи Ҷумҳурии Тоҷикистон таъсис ёфтанд, ки он ба бунёди Артиши миллии Ҷумҳурии Тоҷикистон асос гузошт.

Бо кумаки Ҳукумати мамлакат барои Қувваҳои Мусаллаҳ садҳо иншооти замонавӣ бунёд гашта, ба хизматчиёни ҳарбӣ шароити зарурии хизматӣ фароҳам оварда шуд, бо истифода аз имкониятҳои молиявию иқтисодӣ ҷиҳати мустаҳкам гардондани заминаи моддиву техникии ҷузъу томҳои низомӣ, тақвияти иқтидори мудофиавии кишвар ва баланд бардоштани сатҳи таъминоти иҷтимоии хизматчиёни ҳарбӣ тадбирҳои муфид андешида шуданд.

Кормандони соҳаи ҳифзи муҳити зист имрӯз корҳои муҳиме барои назорати давлатии ҳифзи табиат, истифодабарии оқилонаи сарватҳои табиии кишвар ба роҳ монда истодаанд, то ки иқтидори иқтисодию мудофиавии кишвар устувор гардад, мардуми шарифи мо дар фазои сулҳу оромӣ бо корҳои созандагию ободонӣ машғул гарданд, тараққиёти минбаъдаи Ватани азизамон таъмин гардад.

Дар арафаи рӯзи фархундаи 32-умин солгарди таъсисёбии Қувваҳои Мусаллаҳи Ҷумҳурии Тоҷикистон кормандони соҳаи ҳифзи муҳити зист, табиатистифодабарандагон ва дӯстдорони табиати биҳиштосои кишварамонро бо ин иди муҳими давлатӣ табрику муборакбод менамоям.

Барои Шумо ва муҳофизатгарони кишварамон тани сиҳат, сулҳу оромӣ ва муваффақиятҳои нав ба нави меҳнатиро таманно менамоям.