Замина барои ояндаи сарсабзи Ватан               

                                          

Бо мақсади иҷрои «Барномаи давлатии кабудизоркунии Ҷумҳурии Тоҷикистон барои давраи то соли 2040» дар шаҳри Турсунзода 2300 бех ниҳолҳои ороишию сояафкан ва зиёда аз 5000 қаламчаи сафеддори колифорнӣ шинонида шуд.

Иқдоми мазкур бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳри Турсунзода роҳандозӣ гардида, дар маъракаи ниҳолшинонӣ раиси шаҳри Турсунзода Акрамзода Парвиз ва муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон Лоиқ Раҳмонзода иштирок намуданд.

Мавриди зикр аст, ки дар мавсими имсолаи ниҳолшинонӣ дар шаҳр аллакай 22 ҳазор бех ниҳоли дарахтони гуногун шинонида шудааст. Маъракаи ниҳолшинонӣ бо иштироки кормандони ташкилоту идораҳои гуногун ин навбат дар маркази шаҳри Турсунзода дар ҳудуди хати санитарӣ-муҳофизатӣ ташкил карда шуд.

Ҳадаф барқарор кардани хати мазкур ва таъмини сабзу хуррамию ҳавои тоза дар шаҳр мебошад. Дар ин ҳашари дастаҷамъона зиёда аз 500 нафар иштирок намуданд. Тартиби шинонидани ниҳол ва риоя намудани қоидаҳои агротехникиро мутахассисони соҳаи ҳифзи муҳити зист назорат бурданд.

Ҷиҳати дар амал татбиқ намудани ҳадафҳои «Барномаи давлатии кабудизоркунии мамлакат барои давраи то соли 2040» дар шаҳри Турсунзода нақшаи махсус тартиб дода шудааст, ки дар асоси он ҳамасола бояд корҳои муайян анҷом дода шаванд.

Дар маъракаи ниҳолшинонӣ кормандони ташкилоту муассисаҳо ва дигар сокинони шаҳри Турсунзода фаъолона ширкат намуданд. Гуфта мешавад, ки дар дигар корҳои ободонӣ ҳам сокинони шаҳр ҳамингуна фаъолияти назаррас нишон медиҳанд.

Дар баробари волонтёрони шуъбаи кор бо ҷавонон ва варзиш, ҳамчунин волонтёрони ташкилотҳои ғайридавлатӣ низ фаъолона иштирок намуда, дар ободу зебо ва сабзу хуррам намудани як гӯшаи диёр саҳми худро гузоштанд, ки ин аз ҳамбастагӣ ва сарҷамъии мардум далолат медиҳад.