Ҷараёни барқарорсозии ландшафтҳо дар ноҳияи Айнӣ             

                                          

Дар доираи сиёсати муваффақи Ҳукумати Ҷумҳурии Тоҷикистон таҳти роҳбарию роҳнамоии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон як қатор барномаҳо бо созмонҳои байналмилалӣ, институтҳои молиявии ҷаҳонӣ ва шарикони рушд амалӣ гардида истодаанд.

Бо ибтикори мақомоти иҷроияи ҳокимияти давлатии ноҳияи Айнӣ, дар доираи Лоиҳаи “Барқарорсозии устувори ландшафтҳо дар Ҷумҳурии Тоҷикистон”, дар майдони 156 гектар боғи нав бунёд карда мешавад.

Дар мавзеи “Дашти Боло”-и деҳаи Похути Ҷамоати ноҳияи Айнӣ дар майдони 100 гектар боғи нав бунёд гардида, дар 30 гектари он мувофиқи нақша 15000 бех себ, дар 20 гектар 10000 бех зардолу, дар 20 гектар 13320 бех олуча, дар 20 гектар 16660 бех хуч ва дар 10 гектар 8330 бех ниҳоли акатсия шинони шуд, ки дар умум ниҳолу буттаҳои шинонидашуда 63310 бехро ташкил медиҳанд.

Қайд кардан ба маврид аст, ки дар мавзеи болозикр дар рафти маъракаи ниҳолшинонӣ директори Маркази татбиқи лоиҳаҳои сармоягузории Кумитаи ҳифзи муҳити зисти назди Ҳукумати Ҷумҳурии Тоҷикистон Муҳибулло Ҷунайдзода ва раиси ноҳияи Айнӣ Рӯзибой Раҳимзода бо ҳамроҳии дигар шарикон, ҷамъи васеи сокинон ва кормандони ташкилоту муассисаҳо иштирок намуданд. Зимни маъракаи ниҳолшинонӣ бо пешниҳоди раиси ноҳия ба боғи навбунёд номи “Баракат”-ро гузоштанд, ки ин ҳама ободониҳо аз самараи Истиқлолу сиёсати бунёдкоронаю пурбаракати Пешвои муаззами миллат маншаъ мегирад.

Мувофиқи нақша дар самти фаъолияти минтақаи ҷангалпарварии Фалғар, дар мавзеи “Дашти Боло”-и деҳаи Похут дар доираи шартномаи идоракунии муштараки ҷангал 100 гектар майдони боғи болозикр ба мардуми деҳаҳои Похут, Сайрон ва Фатмовут тақсим гардида, дар бунёди он сокинони деҳоти мазкур камари ҳиммат бастаанд. Бо бунёд гардидани боғ зиёда аз 695 хоҷагии деҳоти дар боло зикршуда соҳиби замину боғ ва бо ҷойи кори доимӣ таъмин мегарданд.

Ҳамчунин, бояд қайд кард, ки дар ояндаи наздик боз 56 гектари дигар боғу заминҳои ба нақшагирифтаи Лоиҳаи “Барқарорсозии устувори ландшафтҳо дар Ҷумҳурии Тоҷикистон” дар заминҳои Агентии хоҷагии ҷангали назди Ҳукумати Ҷумҳурии Тоҷикистон дар ноҳияи Айнӣ, бунёд карда мешаванд.

Боиси зикр аст, ки гирду атрофи боғи “Баракат” аз ҷониби Лоиҳаи мазкур бо симтур махкам карда шуда, корҳои обёрикунии он идома доранд.