Таҷлили Рӯзи байналмилалии ҳифзи пиряхҳо дар пойтахти мамлакат  шаҳри Душанбе               

                                          

22 марти соли 2025 дар Боғи “Ирам”-и” шаҳри Душанбе ҳамоиши сатҳи баланд бахшида ба Рӯзи байналмилалии ҳифзи пиряхҳо, дар доираи ҷашни байналмилалӣ Наврӯз   баргузор гардид. Дар ин чорабинии муҳими экологӣ намояндагони Ҳукумати Ҷумҳурии Тоҷикистон таҳти роҳбарии муовини Сарвазири Ҷумҳурии Тоҷикистон Дилрабо Мансурӣ, Мақомоти иҷроияи ҳокимияти давлатии шаҳри Душанбе, Кумитаи ҳифзи муҳити зисти назди Ҳукумати Ҷумҳурии Тоҷикистон, вазорату идораҳо, ташкилоту муассисаҳо, намояндагони сафоратхонаҳо ва корпусҳои дипломатии муқими Тоҷикистон, инчунин меҳмонони дохилию хориҷӣ иштирок намуданд.

Чорабинии мазкур на танҳо идомаи таҷлили ҷашни Наврӯз ҳамчун мероси фарҳангии ҷаҳонӣ мебошад, балки ҳамзамон бо ташаббуси Пешвои миллат муҳтарам Эмомалӣ Раҳмон дар масъалаҳои муҳити зист, бахусус ҳифзи об ва пиряхҳо, мутобиқати иқлим ва рушди устувор ҳамоҳанг гардидааст. Ташаббусҳои Тоҷикистон дар арсаи байналмилалӣ, аз ҷумла татбиқи Даҳсолаи байналмилалии амал "Об барои рушди устувор, солҳои 2018-2028", пешниҳоди эълони Соли байналмилалии ҳифзи пиряхҳо дар СММ ва таъсиси "Фонди махсуси ҳифзи пиряхҳо" аз ҷониби ҷомеаи ҷаҳонӣ дастгирӣ ёфта, дар доираи ин ҳамоиш мавриди таваҷҷуҳи иштирокдорон қарор дода шуд. Аз ҷумла зимни суханрониҳо қайд гардид, ки моро дар пеш ҳамоишу чорабиниҳои муҳими экологии сатҳи баланд, аз ҷумла Конфронси байналмилалӣ оид ба ҳифзи пиряхҳо дар доираи Даҳсолаи байналмилалии амал “Об барои рушди устувор, солҳои 2021-2025”, ки мизбони он пойтахти азизи мо шаҳри Душанбе мебошад, интизор аст. Ҳамгироёна амал намудан дар ҳамаи масъалаҳои марбут ба обу пиряхҳо, пеш аз ҳама  табиати  кулли  сайёра барои наслҳои оянда ҳифз гардида, аз ҷумла амнияти экологии аҳолӣ ва мавҷудоти дигари зиндаи он таъмин мегардад.

Дар рафти баргузории чорабинӣ, баробари ташкилоту муассисаҳои дигар намоишгоҳи Кумитаи ҳифзи муҳити зисти назди Ҳукумати Ҷумҳурии Тоҷикистон баргузор гардид, ки дар он аксу мусаварраҳо аз табиати нотакрори кишвар, бахусус манбаъҳои обӣ ва пиряхҳои Тоҷикистон ба маъраз гузошта шуданд. Ҳадафи ин намоишгоҳ баланд бардоштани сатҳи огоҳии ҷомеа оид ба аҳаммияти ҳифзи муҳити зист, захираҳои обӣ, аз ҷумла пиряхҳо ва кӯмак ба коҳиш додани таъсири тағйирёбии иқлим мебошад.

Бо дарназардошти нақши Ҷумҳурии Тоҷикистон ҳамчун кишвари пешоҳанг дар ҳалли масъалаҳои глобалии экологӣ, таҷлили ин сана бо иштироки намояндагони гуногун ва мадди аввал қарор доштани масъалаҳои марбут ба обу иқлим аҳаммияти хосса касб мекунад. Чорабинӣ ба таҳкими ҳамкориҳои байналмилалӣ дар самти ҳифзи захираҳои табиӣ, рушди устувор ва татбиқи нақшаҳои амал дар ин самт мусоидат хоҳад кард.