Боздиди комиссияи ҳукуматӣ аз мавзеҳои кабудизоркунии вазорату идораҳо, корхонаҳо ва ташкилоту муассисаҳо               

                                          

11 апрели соли 2025 комиссияи ҳукуматӣ таҳти роҳбари муовини Сарвазири Ҷумҳурии Тоҷикистон муҳтарам Зиёзода Сулаймон Ризоӣ ва раиси Кумитаи ҳифзи муҳити зисти назди Ҳукумати Ҷумҳурии Тоҷикистон муҳтарам Шерализода Баҳодур Аҳмадҷон аз мавзеъҳои кабудизоркунӣ дар таллу теппаҳои ҳудуди шаҳри Душанбе ва шаҳру ноҳияҳои атрофи он, ки дар доираи татбқи Барномаи давлатии кабудизоркунии Ҷумҳурии Тоҷикистон барои давраи то соли 2040 ва Нақшаи амали он барои солҳои 2025-2027 ба вазорату идораҳо, корхонаҳо ва ташкилоту муассисаҳои ҷумҳуриявӣ барои ниҳолшинонӣ вобаста карда шудаанд, боздид ба амал оварданд.

Ҳайати комиссия аз корҳои кабудизоркунӣ, ки аз ҷониби Вазорати кишоварзӣ, Хадамоти гумрук, Корхонаи воҳиди давлатии “Роҳи оҳан” ва Палатаи ҳисоби Ҷумҳурии Тоҷикистон дар ҳудуди ноҳияи Исмоили Сомонии шаҳри Душанбе, ҷамоатҳои шаҳраку деҳоти шаҳри Ваҳдат ва ноҳияи Варзоб анҷом дода шудаанд, дидан намуда, ҷиҳати нигоҳубину беосеб ба воя расонидани ниҳолон ва таъмини сабзиши минбаълаи онҳо ба масъулини вазорату идораҳо, корхонаҳо ва ташкилоту муассисаҳои марбута дастурҳои мушаххас ва тавсияҳои муфид дода шуд.

Инчунин, комиссияи ҳукуматӣ аз рафти корҳо дар самти ташкили хоҷагии ниҳолпарварии мақомоти ҳифзи муҳити зист дар шаҳри Ваҳдат, ки аз наздик шинос шуда, барои дар сатҳу сифати баланд анҷом додани корҳо ва фаъолияти босамара ниҳолхона дастурҳо дода шуд.

Қобили зикр аст, ки боздиди мазкур ба иҷрои саривақтӣ ва босифати дастуру супоришҳои Роҳбарияти Олии кишвар, аз ҷумла татбиқи Барномаи давлатии кабудизоркунии Ҷумҳурии Тоҷикистон барои давраи то соли 2040 ва Нақшаи амали он барои солҳои 2025-2027 мебошад.