Шинонидаи беш аз даҳ ҳазор дарахти сояафкан дар ноҳияи Мурғоб               

                                          

Тибқи дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ҳадаф аз он сабзгардонии муҳити зист ва ободу зебо намудани диёри маҳбубамон — Тоҷикистон мебошад, санаи 18-уми апрели соли равон дар ноҳияи Мурғоб бо иштироки роҳбарияти Мақомоти иҷроияи ҳокимияти давлатии Вилояти Мухтори Кӯҳистони Бадахшон ва роҳбарияту дигар кормандони мақомоти ноҳияи Мурғоб дар ноҳияи мазкур даҳ гектар боғи нав ташкил ёфт. Дар ин мавзеи навбунёд зиёда аз 10 ҳазор дарахти сояафкан шинонида шуд.

Маврид ба ёдоварист, ки бо шарофати ғамхориҳои пайвастаи Ҳукумати Ҷумҳурии Тоҷикистон, хоса Пешвои муаззами миллат муҳтарам Эмомалӣ Раҳмон дар ноҳияи баландкӯҳи Мурғоб корҳои созандагиву ободонӣ вусъат ёфта, сатҳи зиндагии мардум ба маротиб беҳтар шудааст.

Тавре аз маълумоти мавҷуда аён мегардад, дар ташкили боғи густурдадомани мавриди назар тамоми сохтору муассисаҳои марбути вилоят ва ноҳияи мазкур саҳмгузор буданд.

Сокинони ноҳияи Мурғоб, ки бо садоқат ва меҳру муҳаббат дар амалишавии ин ташаббус ширкат варзиданд, миннатдории самимии худро ба Пешвои миллат муҳтарам Эмомалӣ Раҳмон, раиси вилоят ва Кумитаи ҳифзи муҳити зист изҳор намуданд.