Табрикоти Раиси Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба Рӯзи байналмилалии муҳити зист             

                                          

Ҳамкорони гиромӣ,

Шуморо ба муносибати Рӯзи байналмилалии муҳити зист, ки ҳамасола 5-уми июн таҷлил мегардад, самимона табрик мегӯям.

Ин рӯз ҳамчун як санаи муҳими байналмилалӣ аз аҳаммияти бузурги ҳифзи муҳити зист ва рушди устувори ҷомеаи инсонӣ дарак медиҳад. Имрӯз, бештар аз ҳар вақти дигар, зарурати ҳамкории васеи байналмилалӣ ҷиҳати ҳифз, нигоҳдорӣ ва муносибати эҳтиёткорона ба табиат — манбаи ҳаёти инсон эҳсос мегардад.

Ҷумҳурии Тоҷикистон таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ташаббускори як қатор иқдомҳои глобалӣ дар соҳаи ҳифзи муҳити зист ва истифодаи оқилонаи захираҳои табиӣ мебошад. Ҳалли мушкилоти глобалии экологӣ, аз ҷумла мутобиқшавӣ ба тағйирёбии иқлим, пешгирии обшавии пиряхҳо ва идоракунии устувори захираҳои обӣ самтҳои афзалиятноки сиёсати экологии давлат ба шумор меравад.

Кумитаи ҳифзи муҳити зисти назди Ҳукумати Ҷумҳурии Тоҷикистон якҷо бо сохторҳои зертобеи худ, ҷомеаи шаҳрвандӣ ва дигар ниҳодҳои давлатӣ  кӯшиш ба харҷ медиҳад, то захираҳои нодири табиии кишварро ҳифз намояд, вазъи муҳити зистро беҳтар гардонад ва фарҳанги экологии аҳолӣ, пеш аз ҳама кӯдакон ва ҷавононро бо рӯидаст гирифтани чорабиниҳои тарғиботӣ баланд бардорад.

Эҳтиёҷоти аҳолии сайёраи мо рӯз то рӯз ба захираҳои табиӣ меафзояд, бинобар ин зарурат пеш омадааст, ки бо инобати мушкилоти гуногунсамти экологӣ, сарватҳои табиӣ аз ҷониби табиатистифодабарандагон оқилона истифода бурда шуда, дар маҷмӯъ табиат ва гуногунрангии биологии он ҳифз гардад.

Бо истифода аз фурсат ба ҳар яки Шумо кормандони соҳа, муҳофизони табиат тансиҳативу некӯавҳолӣ ва дар  фаъолияти  меҳнатиатон муваффақияту  музаффариятҳо таманно дорам.

Рӯзи умумиҷаҳонии муҳити зист муборак, ҳамкорони гиромӣ!